Hanuman Chalisa

The Hanuman Chalisa — Goswami Tulsidas's beloved forty-verse hymn to Lord Hanuman, recited for courage, protection and the removal of troubles.

श्रीगुरु चरन सरोज रज, निज मनु मुकुरु सुधारि।
बरनउँ रघुबर बिमल जसु, जो दायकु फल चारि॥
बुद्धिहीन तनु जानिके, सुमिरौं पवन कुमार।
बल बुधि बिद्या देहु मोहिं, हरहु कलेस बिकार॥

जय हनुमान ज्ञान गुन सागर। जय कपीस तिहुँ लोक उजागर॥
राम दूत अतुलित बल धामा। अंजनि पुत्र पवनसुत नामा॥

महाबीर बिक्रम बजरंगी। कुमति निवार सुमति के संगी॥
कंचन बरन बिराज सुबेसा। कानन कुंडल कुंचित केसा॥

हाथ बज्र औ ध्वजा बिराजै। काँधे मूँज जनेऊ साजै॥
शंकर सुवन केसरी नंदन। तेज प्रताप महा जग बंदन॥

बिद्यावान गुनी अति चातुर। राम काज करिबे को आतुर॥
प्रभु चरित्र सुनिबे को रसिया। राम लखन सीता मन बसिया॥

सूक्ष्म रूप धरि सियहिं दिखावा। बिकट रूप धरि लंक जरावा॥
भीम रूप धरि असुर सँहारे। रामचंद्र के काज सँवारे॥

लाय सजीवन लखन जियाये। श्रीरघुबीर हरषि उर लाये॥
रघुपति कीन्ही बहुत बड़ाई। तुम मम प्रिय भरतहि सम भाई॥

सहस बदन तुम्हरो जस गावैं। अस कहि श्रीपति कंठ लगावैं॥
सनकादिक ब्रह्मादि मुनीसा। नारद सारद सहित अहीसा॥

जम कुबेर दिगपाल जहाँ ते। कबि कोबिद कहि सके कहाँ ते॥
तुम उपकार सुग्रीवहिं कीन्हा। राम मिलाय राज पद दीन्हा॥

तुम्हरो मंत्र बिभीषन माना। लंकेश्वर भए सब जग जाना॥
जुग सहस्र जोजन पर भानू। लील्यो ताहि मधुर फल जानू॥

प्रभु मुद्रिका मेलि मुख माहीं। जलधि लाँघि गये अचरज नाहीं॥
दुर्गम काज जगत के जेते। सुगम अनुग्रह तुम्हरे तेते॥

राम दुआरे तुम रखवारे। होत न आज्ञा बिनु पैसारे॥
सब सुख लहै तुम्हारी सरना। तुम रच्छक काहू को डर ना॥

आपन तेज सम्हारो आपै। तीनों लोक हाँक तें काँपै॥
भूत पिसाच निकट नहिं आवै। महाबीर जब नाम सुनावै॥

नासै रोग हरै सब पीरा। जपत निरंतर हनुमत बीरा॥
संकट तें हनुमान छुड़ावै। मन क्रम बचन ध्यान जो लावै॥

सब पर राम तपस्वी राजा। तिन के काज सकल तुम साजा॥
और मनोरथ जो कोई लावै। सोइ अमित जीवन फल पावै॥

चारों जुग परताप तुम्हारा। है परसिद्ध जगत उजियारा॥
साधु संत के तुम रखवारे। असुर निकंदन राम दुलारे॥

अष्ट सिद्धि नौ निधि के दाता। अस बर दीन जानकी माता॥
राम रसायन तुम्हरे पासा। सदा रहो रघुपति के दासा॥

तुम्हरे भजन राम को पावै। जनम जनम के दुख बिसरावै॥
अंत काल रघुबर पुर जाई। जहाँ जन्म हरि भक्त कहाई॥

और देवता चित्त न धरई। हनुमत सेइ सर्ब सुख करई॥
संकट कटै मिटै सब पीरा। जो सुमिरै हनुमत बलबीरा॥

जै जै जै हनुमान गोसाईं। कृपा करहु गुरुदेव की नाईं॥
जो सत बार पाठ कर कोई। छूटहि बंदि महा सुख होई॥

जो यह पढ़ै हनुमान चालीसा। होय सिद्धि साखी गौरीसा॥
तुलसीदास सदा हरि चेरा। कीजै नाथ हृदय महँ डेरा॥

पवनतनय संकट हरन, मंगल मूरति रूप।
राम लखन सीता सहित, हृदय बसहु सुर भूप॥

Shriguru charan saroj raj, nij manu mukuru sudhaari.
Baranau Raghubar bimal jasu, jo daayaku phal chaari.
Buddhiheen tanu jaanike, sumirau Pavan Kumaar.
Bal budhi bidya dehu mohi, harahu kalesa bikaar.

Jai Hanuman gyan gun saagar. Jai Kapis tihu lok ujaagar.
Ram doot atulit bal dhaama. Anjani putra Pavansut naama.

Mahabir bikram bajrangi. Kumati nivaar sumati ke sangi.
Kanchan baran biraaj subesa. Kaanan kundal kunchit kesa.

Haath bajra au dhwaja biraajai. Kaandhe moonj janeu saajai.
Shankar suvan Kesari nandan. Tej prataap maha jag bandan.

Bidyavaan guni ati chaatur. Ram kaaj karibe ko aatur.
Prabhu charitra sunibe ko rasiya. Ram Lakhan Sita man basiya.

Sukshma roop dhari Siyahi dikhaava. Bikat roop dhari Lank jaraava.
Bhim roop dhari asur sanhaare. Ramchandra ke kaaj sanvaare.

Laay sajivan Lakhan jiyaaye. Shri Raghubir harashi ur laaye.
Raghupati keenhi bahut badaai. Tum mam priya Bharatahi sam bhaai.

Sahas badan tumharo jas gaavai. As kahi Shripati kanth lagaavai.
Sanakaadik Brahmaadi munisa. Narad Saarad sahit Ahisa.

Jam Kuber digpaal jahaan te. Kabi kobid kahi sake kahaan te.
Tum upkaar Sugrivahi keenha. Ram milaay raaj pad deenha.

Tumharo mantra Bibhishan maana. Lankeshwar bhaye sab jag jaana.
Jug sahasra jojan par Bhaanu. Leelyo taahi madhur phal jaanu.

Prabhu mudrika meli mukh maahi. Jaladhi laanghi gaye achraj naahi.
Durgam kaaj jagat ke jete. Sugam anugrah tumhare tete.

Ram duaare tum rakhvaare. Hot na aagya binu paisaare.
Sab sukh lahai tumhaari sarna. Tum rachchhak kaahu ko dar na.

Aapan tej samhaaro aapai. Teeno lok haank te kaanpai.
Bhoot pisaach nikat nahi aavai. Mahabir jab naam sunaavai.

Naasai rog harai sab peera. Japat nirantar Hanumat beera.
Sankat te Hanuman chhudaavai. Man kram bachan dhyaan jo laavai.

Sab par Ram tapasvi raaja. Tin ke kaaj sakal tum saaja.
Aur manorath jo koi laavai. Soi amit jivan phal paavai.

Chaaro jug partaap tumhaara. Hai parsiddh jagat ujiyaara.
Saadhu sant ke tum rakhvaare. Asur nikandan Ram dulaare.

Asht siddhi nau nidhi ke daata. As bar deen Jaanki maata.
Ram rasaayan tumhare paasa. Sada raho Raghupati ke daasa.

Tumhare bhajan Ram ko paavai. Janam janam ke dukh bisraavai.
Ant kaal Raghubar pur jaai. Jahaan janm Hari bhakt kahaai.

Aur devta chitt na dharai. Hanumat sei sarb sukh karai.
Sankat katai mitai sab peera. Jo sumirai Hanumat balbeera.

Jai jai jai Hanuman Gosaai. Kripa karahu gurudev ki naai.
Jo sat baar paath kar koi. Chhootahi bandi maha sukh hoi.

Jo yah padhai Hanuman Chalisa. Hoy siddhi saakhi Gaurisa.
Tulsidas sada Hari chera. Keejai naath hriday mah dera.

Pavantanay sankat haran, mangal moorati roop.
Ram Lakhan Sita sahit, hriday basahu sur bhoop.

About the Hanuman Chalisa