The Ganga Lahari — Pandita Jagannatha's heartfelt hymn (the "wave of nectar") in praise of Mother Ganga, sung in surrender at her banks.
गंगालहरी
समृद्धं सौभाग्यं सकलवसुधायाः किमपि तन्
महैश्वर्यं लीलाजनितजगतः खण्डपरशोः ।
श्रुतीनां सर्वस्वं सुकृतमथ मूर्तं सुमनसां
सुधासोदर्यं ते सलिलमशिवं नः शमयतु ॥ १॥
दरिद्राणां दैन्यं दुरितमथ दुर्वासनहृदां
द्रुतं दूरीकुर्वन् सकृदपि गतो दृष्टिसरणिम् ।
अपि द्रागाविद्याद्रुमदलनदीक्षागुरुरिह
प्रवाहस्ते वारां श्रियमयमपारां दिशतु नः ॥ २॥
उदञ्चन्मार्तण्डस्फुटकपटहेरम्बजननी-
कटाक्षव्याक्षेपक्षणजनितसंक्षोभनिवहाः ।
भवन्तु त्वङ्गन्तो हरशिरसि गङ्गातनुभुव-
स्तरङ्गाः प्रोत्तुङ्गा दुरितभयभङ्गाय भवताम् ॥ ३॥
तवालम्बादम्ब स्फुरदलघुगर्वेण सहसा
मया सर्वेऽवज्ञासरणिमथ नीताः सुरगणाः ।
इदानीमौदास्यं भजसि यदि भागीरथि तदा
निराधारो हा रोदिमि कथय केषामिह पुरः ॥ ४॥
स्मृतिं याता पुंसामकृतसुकृतानामपि च या
हरत्यन्तस्तन्द्रां तिमिरमिव चन्द्रांशुसरणिः ।
इयं सा ते मूर्तिः सकलसुरसंसेव्यसलिला
ममान्तःसन्तापं त्रिविधमपि पापं च हरताम् ॥ ५॥
अपि प्राज्यं राज्यं तृणमिव परित्यज्य सहसा
विलोलद्वानीरं तव जननि तीरं श्रितवताम् ।
सुधातः स्वादीयस्सलिलभरमातृप्ति पिबतां
जनानामानन्दः परिहसति निर्वाणपदवीम् ॥ ६॥
प्रभाते स्नातीनां नृपतिरमणीनां कुचतटी-
गतो यावन्मातर्मिलति तव तोयैर्मृगमदः ।
मृगास्तावद्वैमानिकशतसहस्रैः परिवृता
विशन्ति स्वच्छन्दं विमलवपुषो नन्दनवनम् ॥ ७॥
स्मृतं सद्यः स्वान्तं विरचयति शान्तं सकृदपि
प्रगीतं यत्पापं झटिति भवतापं च हरति ।
इदं तद्गङ्गेति श्रवणरमणीयं खलु पदं
मम प्राणप्रान्ते वदनकमलान्तर्विलसतु ॥ ८॥
यदन्तः खेलन्तो बहुलतरसन्तोषभरिता
न काका नाकाधीश्वरनगरसाकाङ्क्षमनसः ।
निवासाल्लोकानां जनिमरणशोकापहरणं
तदेतत्ते तीरं श्रमशमनधीरं भवतु नः ॥ ९॥
न यत्साक्षाद्वेदैरपि गलितभेदैरवसितं
न यस्मिन् जीवानां प्रसरति मनोवागवसरः ।
निराकारं नित्यं निजमहिमनिर्वासिततमो
विशुद्धं यत्तत्त्वं सुरतटिनि तत्त्वं न विषयः ॥ १०॥
महादानैर्ध्यानैर्बहुविधवितानैरपि च यन्
न लभ्यं घोराभिः सुविमलतपोराशिभिरपि ।
अचिन्त्यं तद्विष्णोः पदमखिलसाधारणतया
ददाना केनासि त्वमिह तुलनीया कथय नः ॥ ११॥
नृणामीक्षामात्रादपि परिहरन्त्या भवभयं
शिवायास्ते मूर्तेः क इह महिमानं निगदतु ।
अमर्षम्लानायाः परममनुरोधं गिरिभुवो
विहाय श्रीकण्ठः शिरसि नियतं धारयति याम् ॥ १२॥
विनिन्द्यान्युन्मत्तैरपि च परिहार्याणि पतितै-
रवाच्यानि व्रात्यैः सपुलकमपास्यानि पिशुनैः ।
हरन्ती लोकानामनवरतमेनांसि कियतां
कदाप्यश्रान्ता त्वं जगति पुनरेका विजयसे ॥ १३॥
स्खलन्ती स्वर्लोकादवनितलशोकापहृतये
जटाजूटग्रन्थौ यदसि विनिबद्धा पुरभिदा ।
अये निर्लोभानामपि मनसि लोभं जनयतां
गुणानामेवायं तव जननि दोषः परिणतः ॥ १४॥
जडानन्धान् पङ्गून् प्रकृतिबधिरानुक्तिविकलान्
ग्रहग्रस्तानस्ताखिलदुरितनिस्तारसरणीन् ।
निलिम्पैर्निर्मुक्तानपि च निरयान्तर्निपततो
नरानम्ब त्रातुं त्वमिह परमं भेषजमसि ॥ १५॥
स्वभावस्वच्छानां सहजशिशिराणामयमपा-
मपारस्ते मातर्जयति महिमा कोऽपि जगति ।
मुदायं गायन्ति द्युतलमनवद्यद्युतिभृतः
समासाद्याद्यापि स्फुटपुलकसान्द्राः सगरजाः ॥ १६॥
कृतक्षुद्रैनस्कानथ झटिति सन्तप्तमनसः
समुद्धर्तुं सन्ति त्रिभुवनतले तीर्थनिवहाः ।
अपि प्रायश्चित्तप्रसरणपथातीतचरिता-
न्नरानूरीकर्तुं त्वमिव जननि त्वं विजयसे ॥ १७॥
निधानं धर्माणां किमपि च विधानं नवमुदां
प्रधानं तीर्थानाममलपरिधानं त्रिजगतः ।
समाधानं बुद्धेरथ खलु तिरोधानमधियां
श्रियामाधानं नः परिहरतु तापं तव वपुः ॥ १८॥
पुरो धावं धावं द्रविणमदिराघूर्णितदृशां
महीपानां नानातरुणतरखेदस्य नियतम् ।
ममैवायं मन्तुः स्वहितशतहन्तुर्जडधियो
वियोगस्ते मातर्यदिह करुणातः क्षणमपि ॥ १९॥
मरुल्लीलालोलल्लहरिलुलिताम्भोजपटली-
स्खलत्पांसुव्रातच्छुरणविसरत्कौङ्कुमरुचि ।
सुरस्त्रीवक्षोजक्षरदगरुजम्बालजटिलं
जलं ते जम्बालं मम जननजालं जरयतु ॥ २०॥
समुत्पत्तिः पद्मारमणपदपद्मामलनखा-
न्निवासः कन्दर्पप्रतिभटजटाजूटभवने ।
अथाऽयं व्यासङ्गो हतपतितनिस्तारणविधौ
न कस्मादुत्कर्षस्तव जननि जागर्तु जगति ॥ २१॥
नगेभ्यो यान्तीनां कथय तटिनीनां कतमया
पुराणां संहर्तुः सुरधुनि कपर्दोऽधिरुरुहे ।
कया वा श्रीभर्तुः पदकमलमक्षालि सलिलै-
स्तुलालेशो यस्यां तव जननि दीयेत कविभिः ॥ २२॥
विधत्तां निःशङ्कं निरवधि समाधिं विधिरहो
सुखं शेषे शेतां हरिरविरतं नृत्यतु हरः ।
कृतं प्रायश्चित्तैरलमथ तपोदानयजनैः
सवित्री कामानां यदि जगति जागर्ति जननी ॥ २३॥
अनाथः स्नेहार्द्रां विगलितगतिः पुण्यगतिदां
पतन् विश्वोद्धर्त्रीं गदविगलितः सिद्धभिषजम् ।
सुधासिन्धुं तृष्णाकुलितहृदयो मातरमयं
शिशुः सम्प्राप्तस्त्वामहमिह विदध्याः समुचितम् ॥ २४॥
विलीनो वै वैवस्वतनगरकोलाहलभरो
गता दूता दूरं क्वचिदपि परेतान् मृगयितुम् ।
विमानानां व्रातो विदलयति वीथिर्दिविषदां
कथा ते कल्याणी यदवधि महीमण्डलमगात् ॥ २५॥
स्फुरत्कामक्रोधप्रबलतरसञ्जातजटिल-
ज्वरज्वालाजालज्वलितवपुषां नः प्रतिदिनम् ।
हरन्तां सन्तापं कमपि मरुदुल्लासलहरि-
च्छटाचञ्चत्पाथःकणसरणयो दिव्यसरितः ॥ २६॥
इदं हि ब्रह्माण्डं सकलभुवनाभोगभवनं
तरङ्गैर्यस्यान्तर्लुठति परितस्तिन्दुकमिव ।
स एष श्रीकण्ठप्रविततजटाजूटजटिलो
जलानां सङ्घातस्तव जननि तापं हरतु नः ॥ २७॥
त्रपन्ते तीर्थानि त्वरितमिह यस्योद्धृतिविधौ
करं कर्णे कुर्वन्त्यपि किल कपालिप्रभृतयः ।
इमं त्वं मामम्ब त्वमियमनुकम्पार्द्रहृदये
पुनाना सर्वेषामघमथनदर्पं दलयसि ॥ २८॥
श्वपाकानां व्रातैरमितविचिकित्साविचलितै-
र्विमुक्तानामेकं किल सदनमेनःपरिषदाम् ।
अहो मामुद्धर्तुं जननि घटयन्त्याः परिकरं
तव श्लाघां कर्तुं कथमिव समर्थो नरपशुः ॥ २९॥
न कोऽप्येतावन्तं खलु समयमारभ्य मिलितो
यदुद्धारादाराद्भवति जगतो विस्मयभरः ।
इतीमामीहां ते मनसि चिरकालं स्थितवती-
मयं सम्प्राप्तोऽहं सफलयितुमम्ब प्रणय नः ॥ ३०॥
श्ववृत्तिव्यासङ्गो नियतमथ मिथ्याप्रलपनं
कुतर्केश्वभ्यासः सततपरपैशुन्यमननम् ।
अपि श्रावं श्रावं मम तु पुनरेवं गुणगणा-
नृते त्वत्को नाम क्षणमपि निरीक्षेत वदनम् ॥ ३१॥
विशालाभ्यामाभ्यां किमिह नयनाभ्यां खलु फलं
न याभ्यामालीढा परमरमणीया तव तनुः ।
अयं हि न्यक्कारो जननि मनुजस्य श्रवणयो-
र्ययोर्नान्तर्यातस्तव लहरिलीलाकलकलः ॥ ३२॥
विमानैः स्वच्छन्दं सुरपुरमयन्ते सुकृतिनः
पतन्ति द्राक् पापा जननि नरकान्तः परवशाः ।
विभागोऽयं तस्मिन्नशुभमयमूर्तौ जनपदे
न यत्र त्वं लीलादलितमनुजाशेषकलुषा ॥ ३३॥
अपि घ्नन्तो विप्रानविरतमुशन्तो गुरुसतीः
पिबन्तो मैरेयं पुनरपि हरन्तश्च कनकम् ।
विहाय त्वय्यन्ते तनुमतनुदानाध्वरजुषा-
मुपर्यम्ब क्रीडन्त्यखिलसुरसम्भावितपदाः ॥ ३४॥
अलभ्यं सौरभ्यं हरति सततं यः सुमनसां
क्षणादेव प्राणानपि विरहशस्त्रक्षतहृदाम् ।
त्वदीयानां लीलाचलितलहरीणां व्यतिकरात्
पुनीते सोऽपि द्रागहह पवमानस्त्रिभुवनम् ॥ ३५॥
कियन्तः सन्त्येके नियतमिहलोकार्थघटकाः
परे पूतात्मानः कति च परलोकप्रणयिनः ।
सुखं शेते मातस्तव खलु कृपातः पुनरयं
जगन्नाथः शश्वत्त्वयि निहितलोकद्वयभरः ॥ ३६॥
भवत्या हि व्रात्याधमपतितपाखण्डपरिषत्
परित्राणस्नेहः श्लथयितुमशक्यः खलु यथा ।
ममाप्येवं प्रेमा दुरितनिवहेष्वम्ब जगति
स्वभावोऽयं सर्वैरपि खलु यतो दुष्परिहरः ॥ ३७॥
प्रदोषान्तर्नृत्यत्पुरमथनलीलोद्धृतजटा-
तटाभोगप्रेङ्खल्लहरिभुजसन्तानविधुतिः ।
बिलक्रोडक्रीडज्जलडमरुटङ्कारसुभग-
स्तिरोधत्तां तापं त्रिदशतटिनीताण्डवविधिः ॥ ३८॥
सदैव त्वय्येवार्पितकुशलचिन्ताभरमिमं
यदि त्वं मामम्ब त्यजसि समयेऽस्मिन्सुविषमे ।
तदा विश्वासोऽयं त्रिभुवनतलादस्तमयते
निराधारा चेयं भवति खलु निर्व्याजकरुणा ॥ ३९॥
कपर्दादुल्लस्य प्रणयमिलदर्धाङ्गयुवतेः
पुरारेः प्रेङ्खन्त्यो मृदुलतरसीमन्तसरणौ ।
भवान्या सापत्न्यस्फुरितनयनं कोमलरुचा
करेणाक्षिप्तास्ते जननि विजयन्तां लहरयः ॥ ४०॥
प्रपद्यन्ते लोकाः कति न भवतीमत्रभवती-
मुपाधिस्तत्रायं स्फुरति यदभीष्टं वितरसि ।
शपे तुभ्यं मातर्मम तु पुनरात्मा सुरधुनि
स्वभावादेव त्वय्यमितमनुरागं विधृतवान् ॥ ४१॥
ललाटे या लोकैरिह खलु सलीलं तिलकिता
तमो हन्तुं धत्ते तरुणतरमार्तण्डतुलनाम् ।
विलुम्पन्ती सद्यो विधिलिखितदुर्वर्णसरणिं
त्वदीया सा मृत्स्ना मम हरतु कृत्स्नामपि शुचम् ॥ ४२॥
नरान् मूढांस्तत्तज्जनपदसमासक्तमनसो
हसन्तः सोल्लासं विकचकुसुमव्रातमिषतः ।
पुनानाः सौरभ्यैः सततमलिनो नित्यमलिनान्
सखायो नः सन्तु त्रिदशतटिनीतीरतरवः ॥ ४३॥
यजन्त्येके देवान् कठिनतरसेवांस्तदपरे
वितानव्यासक्ता यमनियमरक्ताः कतिपये ।
अहं तु त्वन्नामस्मरणकृतकामस्त्रिपथगे
जगज्जालं जाने जननि तृणजालेन सदृशम् ॥ ४४॥
अविश्रान्तं जन्मावधि सुकृतजन्मार्जनकृतां
सतां श्रेयः कर्तुं कति न कृतिनः सन्ति विबुधाः ।
निरस्तालम्बानामकृतसुकृतानां तु भवतीं
विनाऽमुष्मिंल्लोके न परमवलोके हितकरम् ॥ ४५॥
पयः पीत्वा मातस्तव सपदि यातः सहचरै-
र्विमूढैः संरन्तुं क्वचिदपि न विश्रान्तिमगमम् ।
इदानीमुत्सङ्गे मृदुपवनसञ्चारशिशिरे
चिरादुन्निद्रं मां सदयहृदये शायय चिरम् ॥ ४६॥
बधान द्रागेव द्रढिमरमणीयं परिकरं
किरीटे बालेन्दुं नियमय पुनः पन्नगगणैः ।
न कुर्यास्त्वं हेलामितरजनसाधारणतया
जगन्नाथस्यायं सुरधुनि समुद्धारसमयः ॥ ४७॥
शरच्चन्द्रश्वेतां शशिशकलश्वेतालमुकुटां
करैः कुम्भाम्भोजे वरभयनिरासौ च दधतीम् ।
सुधाधाराकाराभरणवसनां शुभ्रमकर-
स्थितां त्वां ये ध्यायन्त्युदयति न तेषां परिभवः ॥ ४८॥
दरस्मितसमुल्लसद्वदनकान्तिपूरामृतै-
र्भवज्वलनभर्जिताननिशमूर्जयन्ती नरान् ।
चिदेकमयचन्द्रिकाचयचमत्कृतिं तन्वती
तनोतु मम शन्तनोः सपदि शन्तनोरङ्गना ॥ ४९॥
मन्त्रैर्मीलितमौषधैर्मुकुलितं त्रस्तं सुराणां गणैः
स्रस्तं सान्द्रसुधारसैर्विदलितं गारुत्मतैर्ग्रावभिः ।
वीचिक्षालितकालियाहितपदे स्वर्लोककल्लोलिनि
त्वं तापं तिरयाधुना मम भवज्वालावलीढात्मनः ॥ ५०॥
द्यूते नागेन्द्रकृत्तिप्रमथगणमणिश्रेणिनन्दीन्दुमुख्यं
सर्वस्वं हारयित्वा स्वमथ पुरभिदि द्राक् पणीकर्तुकामे ।
साकूतं हैमवत्या मृदुलहसितया वीक्षितायास्तवाम्ब
व्यालोलोल्लासिवल्गल्लहरिनटघटीताण्डवं नः पुनातु ॥ ५१॥
विभूषितानङ्गरिपूत्तमाङ्गा सद्यःकृतानेकजनार्तिभङ्गा ।
मनोहरोत्तुङ्गचलत्तरङ्गा गङ्गा ममाङ्गान्यमलीकरोतु ॥ ५२॥
इमां पीयूषलहरीं जगन्नाथेन निर्मिताम् ।
यः पठेत्तस्य सर्वत्र जायन्ते सुखसम्पदः ॥ ५३॥
gamgalahari
samriddham saubhagyam sakalavasudhayah kimapi tan
mahaishvaryam lilajanitajagatah khandaparashoh ।
shrutinam sarvasvam sukritamatha murtam sumanasam
sudhasodaryam te salilamashivam nah shamayatu ॥ 1॥
daridranam dainyam duritamatha durvasanahridam
drutam durikurvan sakridapi gato drishtisaranim ।
api dragavidyadrumadalanadikshagururiha
pravahaste varam shriyamayamaparam dishatu nah ॥ 2॥
udanchanmartandasphutakapataherambajanani-
katakshavyakshepakshanajanitasamkshobhanivahah ।
bhavantu tvanganto harashirasi gangatanubhuva-
starangah prottunga duritabhayabhangaya bhavatam ॥ 3॥
tavalambadamba sphuradalaghugarvena sahasa
maya sarve'vajnasaranimatha nitah suraganah ।
idanimaudasyam bhajasi yadi bhagirathi tada
niradharo ha rodimi kathaya keshamiha purah ॥ 4॥
smritim yata pumsamakritasukritanamapi cha ya
haratyantastandram timiramiva chandramshusaranih ।
iyam sa te murtih sakalasurasamsevyasalila
mamantahsantapam trividhamapi papam cha haratam ॥ 5॥
api prajyam rajyam trinamiva parityajya sahasa
viloladvaniram tava janani tiram shritavatam ।
sudhatah svadiyassalilabharamatripti pibatam
jananamanandah parihasati nirvanapadavim ॥ 6॥
prabhate snatinam nripatiramaninam kuchatati-
gato yavanmatarmilati tava toyairmrigamadah ।
mrigastavadvaimanikashatasahasraih parivrita
vishanti svachchhandam vimalavapusho nandanavanam ॥ 7॥
smritam sadyah svantam virachayati shantam sakridapi
pragitam yatpapam jhatiti bhavatapam cha harati ।
idam tadgangeti shravanaramaniyam khalu padam
mama pranaprante vadanakamalantarvilasatu ॥ 8॥
yadantah khelanto bahulatarasantoshabharita
na kaka nakadhishvaranagarasakankshamanasah ।
nivasallokanam janimaranashokapaharanam
tadetatte tiram shramashamanadhiram bhavatu nah ॥ 9॥
na yatsakshadvedairapi galitabhedairavasitam
na yasmin jivanam prasarati manovagavasarah ।
nirakaram nityam nijamahimanirvasitatamo
vishuddham yattattvam suratatini tattvam na vishayah ॥ 10॥
mahadanairdhyanairbahuvidhavitanairapi cha yan
na labhyam ghorabhih suvimalataporashibhirapi ।
achintyam tadvishnoh padamakhilasadharanataya
dadana kenasi tvamiha tulaniya kathaya nah ॥ 11॥
nrinamikshamatradapi pariharantya bhavabhayam
shivayaste murteh ka iha mahimanam nigadatu ।
amarshamlanayah paramamanurodham giribhuvo
vihaya shrikanthah shirasi niyatam dharayati yam ॥ 12॥
vinindyanyunmattairapi cha pariharyani patitai-
ravachyani vratyaih sapulakamapasyani pishunaih ।
haranti lokanamanavaratamenamsi kiyatam
kadapyashranta tvam jagati punareka vijayase ॥ 13॥
skhalanti svarlokadavanitalashokapahritaye
jatajutagranthau yadasi vinibaddha purabhida ।
aye nirlobhanamapi manasi lobham janayatam
gunanamevayam tava janani doshah parinatah ॥ 14॥
jadanandhan pangun prakritibadhiranuktivikalan
grahagrastanastakhiladuritanistarasaranin ।
nilimpairnirmuktanapi cha nirayantarnipatato
naranamba tratum tvamiha paramam bheshajamasi ॥ 15॥
svabhavasvachchhanam sahajashishiranamayamapa-
maparaste matarjayati mahima ko'pi jagati ।
mudayam gayanti dyutalamanavadyadyutibhritah
samasadyadyapi sphutapulakasandrah sagarajah ॥ 16॥
kritakshudrainaskanatha jhatiti santaptamanasah
samuddhartum santi tribhuvanatale tirthanivahah ।
api prayashchittaprasaranapathatitacharita-
nnaranurikartum tvamiva janani tvam vijayase ॥ 17॥
nidhanam dharmanam kimapi cha vidhanam navamudam
pradhanam tirthanamamalaparidhanam trijagatah ।
samadhanam buddheratha khalu tirodhanamadhiyam
shriyamadhanam nah pariharatu tapam tava vapuh ॥ 18॥
puro dhavam dhavam dravinamadiraghurnitadrisham
mahipanam nanatarunatarakhedasya niyatam ।
mamaivayam mantuh svahitashatahanturjadadhiyo
viyogaste mataryadiha karunatah kshanamapi ॥ 19॥
marullilalolallaharilulitambhojapatali-
skhalatpamsuvratachchhuranavisaratkaunkumaruchi ।
surastrivakshojaksharadagarujambalajatilam
jalam te jambalam mama jananajalam jarayatu ॥ 20॥
samutpattih padmaramanapadapadmamalanakha-
nnivasah kandarpapratibhatajatajutabhavane ।
atha'yam vyasango hatapatitanistaranavidhau
na kasmadutkarshastava janani jagartu jagati ॥ 21॥
nagebhyo yantinam kathaya tatininam katamaya
puranam samhartuh suradhuni kapardo'dhiruruhe ।
kaya va shribhartuh padakamalamakshali salilai-
stulalesho yasyam tava janani diyeta kavibhih ॥ 22॥
vidhattam nihshankam niravadhi samadhim vidhiraho
sukham sheshe shetam hariraviratam nrityatu harah ।
kritam prayashchittairalamatha tapodanayajanaih
savitri kamanam yadi jagati jagarti janani ॥ 23॥
anathah snehardram vigalitagatih punyagatidam
patan vishvoddhartrim gadavigalitah siddhabhishajam ।
sudhasindhum trishnakulitahridayo mataramayam
shishuh sampraptastvamahamiha vidadhyah samuchitam ॥ 24॥
vilino vai vaivasvatanagarakolahalabharo
gata duta duram kvachidapi paretan mrigayitum ।
vimananam vrato vidalayati vithirdivishadam
katha te kalyani yadavadhi mahimandalamagat ॥ 25॥
sphuratkamakrodhaprabalatarasanjatajatila-
jvarajvalajalajvalitavapusham nah pratidinam ।
harantam santapam kamapi marudullasalahari-
chchhatachanchatpathahkanasaranayo divyasaritah ॥ 26॥
idam hi brahmandam sakalabhuvanabhogabhavanam
tarangairyasyantarluthati paritastindukamiva ।
sa esha shrikanthapravitatajatajutajatilo
jalanam sanghatastava janani tapam haratu nah ॥ 27॥
trapante tirthani tvaritamiha yasyoddhritividhau
karam karne kurvantyapi kila kapaliprabhritayah ।
imam tvam mamamba tvamiyamanukampardrahridaye
punana sarveshamaghamathanadarpam dalayasi ॥ 28॥
shvapakanam vratairamitavichikitsavichalitai-
rvimuktanamekam kila sadanamenahparishadam ।
aho mamuddhartum janani ghatayantyah parikaram
tava shlagham kartum kathamiva samartho narapashuh ॥ 29॥
na ko'pyetavantam khalu samayamarabhya milito
yaduddharadaradbhavati jagato vismayabharah ।
itimamiham te manasi chirakalam sthitavati-
mayam samprapto'ham saphalayitumamba pranaya nah ॥ 30॥
shvavrittivyasango niyatamatha mithyapralapanam
kutarkeshvabhyasah satataparapaishunyamananam ।
api shravam shravam mama tu punarevam gunagana-
nrite tvatko nama kshanamapi niriksheta vadanam ॥ 31॥
vishalabhyamabhyam kimiha nayanabhyam khalu phalam
na yabhyamalidha paramaramaniya tava tanuh ।
ayam hi nyakkaro janani manujasya shravanayo-
ryayornantaryatastava laharililakalakalah ॥ 32॥
vimanaih svachchhandam surapuramayante sukritinah
patanti drak papa janani narakantah paravashah ।
vibhago'yam tasminnashubhamayamurtau janapade
na yatra tvam liladalitamanujasheshakalusha ॥ 33॥
api ghnanto vipranaviratamushanto gurusatih
pibanto maireyam punarapi harantashcha kanakam ।
vihaya tvayyante tanumatanudanadhvarajusha-
muparyamba kridantyakhilasurasambhavitapadah ॥ 34॥
alabhyam saurabhyam harati satatam yah sumanasam
kshanadeva prananapi virahashastrakshatahridam ।
tvadiyanam lilachalitalaharinam vyatikarat
punite so'pi dragahaha pavamanastribhuvanam ॥ 35॥
kiyantah santyeke niyatamihalokarthaghatakah
pare putatmanah kati cha paralokapranayinah ।
sukham shete matastava khalu kripatah punarayam
jagannathah shashvattvayi nihitalokadvayabharah ॥ 36॥
bhavatya hi vratyadhamapatitapakhandaparishat
paritranasnehah shlathayitumashakyah khalu yatha ।
mamapyevam prema duritanivaheshvamba jagati
svabhavo'yam sarvairapi khalu yato dushpariharah ॥ 37॥
pradoshantarnrityatpuramathanaliloddhritajata-
tatabhogaprenkhallaharibhujasantanavidhutih ।
bilakrodakridajjaladamarutankarasubhaga-
stirodhattam tapam tridashatatinitandavavidhih ॥ 38॥
sadaiva tvayyevarpitakushalachintabharamimam
yadi tvam mamamba tyajasi samaye'sminsuvishame ।
tada vishvaso'yam tribhuvanataladastamayate
niradhara cheyam bhavati khalu nirvyajakaruna ॥ 39॥
kapardadullasya pranayamiladardhangayuvateh
purareh prenkhantyo mridulatarasimantasaranau ।
bhavanya sapatnyasphuritanayanam komalarucha
karenakshiptaste janani vijayantam laharayah ॥ 40॥
prapadyante lokah kati na bhavatimatrabhavati-
mupadhistatrayam sphurati yadabhishtam vitarasi ।
shape tubhyam matarmama tu punaratma suradhuni
svabhavadeva tvayyamitamanuragam vidhritavan ॥ 41॥
lalate ya lokairiha khalu salilam tilakita
tamo hantum dhatte tarunataramartandatulanam ।
vilumpanti sadyo vidhilikhitadurvarnasaranim
tvadiya sa mritsna mama haratu kritsnamapi shucham ॥ 42॥
naran mudhamstattajjanapadasamasaktamanaso
hasantah sollasam vikachakusumavratamishatah ।
punanah saurabhyaih satatamalino nityamalinan
sakhayo nah santu tridashatatinitirataravah ॥ 43॥
yajantyeke devan kathinatarasevamstadapare
vitanavyasakta yamaniyamaraktah katipaye ।
aham tu tvannamasmaranakritakamastripathage
jagajjalam jane janani trinajalena sadrisham ॥ 44॥
avishrantam janmavadhi sukritajanmarjanakritam
satam shreyah kartum kati na kritinah santi vibudhah ।
nirastalambanamakritasukritanam tu bhavatim
vina'mushmimlloke na paramavaloke hitakaram ॥ 45॥
payah pitva matastava sapadi yatah sahacharai-
rvimudhaih samrantum kvachidapi na vishrantimagamam ।
idanimutsange mridupavanasancharashishire
chiradunnidram mam sadayahridaye shayaya chiram ॥ 46॥
badhana drageva dradhimaramaniyam parikaram
kirite balendum niyamaya punah pannagaganaih ।
na kuryastvam helamitarajanasadharanataya
jagannathasyayam suradhuni samuddharasamayah ॥ 47॥
sharachchandrashvetam shashishakalashvetalamukutam
karaih kumbhambhoje varabhayanirasau cha dadhatim ।
sudhadharakarabharanavasanam shubhramakara-
sthitam tvam ye dhyayantyudayati na tesham paribhavah ॥ 48॥
darasmitasamullasadvadanakantipuramritai-
rbhavajvalanabharjitananishamurjayanti naran ।
chidekamayachandrikachayachamatkritim tanvati
tanotu mama shantanoh sapadi shantanorangana ॥ 49॥
mantrairmilitamaushadhairmukulitam trastam suranam ganaih
srastam sandrasudharasairvidalitam garutmatairgravabhih ।
vichikshalitakaliyahitapade svarlokakallolini
tvam tapam tirayadhuna mama bhavajvalavalidhatmanah ॥ 50॥
dyute nagendrakrittipramathaganamanishreninandindumukhyam
sarvasvam harayitva svamatha purabhidi drak panikartukame ।
sakutam haimavatya mridulahasitaya vikshitayastavamba
vyalolollasivalgallaharinataghatitandavam nah punatu ॥ 51॥
vibhushitanangariputtamanga sadyahkritanekajanartibhanga ।
manoharottungachalattaranga ganga mamanganyamalikarotu ॥ 52॥
imam piyushalaharim jagannathena nirmitam ।
yah pathettasya sarvatra jayante sukhasampadah ॥ 53॥
